کراچی: تحریک انصاف کے رکن قومی اسمبلی اور سماجی تنظیم فکس اٹ کے بانی عالمگیر خان نے گجر نالے کے کچرے پر وزیر اعلیٰ سندھ مراد علی شاہ کی تصویر لگا کر انوکھا احتجاج ریکارڈ کروایا۔
اے آر وائی نیوز کی رپورٹ کے مطابق کراچی میں متوقع مون سون کی بارشوں کی پیش گوئی کے بعد بھی سندھ حکومت نے نالوں کی صفائی کا کام بروقت مکمل نہیں کیا جس کی وجہ سے شہر میں اربن فلڈ کا خطرہ ہے۔
سماجی تنظیم کے بانی عالمگیر خان نے گجر نالہ پہنچ کر سندھ حکومت کے خلاف انوکھے انداز میں احتجاج ریکارڈ کرایا اور وزیر اعلیٰ کی تصویر کچرے پر لگا دی. فکس اٹ کے بانی کا کہنا تھا کہ ’وزیراعلی سندھ ادھر آئیں اور اپنی رین ایمرجنسی کے دعوؤں کو دیکھ لیں‘۔
رکن قومی اسمبلی عالمگیر خان کا کہنا تھا کہ ’گجرنالے پر تاحال صفائی کے اقدامات نہیں کیے گئے، بارش سے تین روز پہلے مشینری حاصل کر کے بس صفائی کا ڈرامہ رچایا جارہا ہے‘۔
مزید پڑھیں: کراچی میں مون سون کی آمد، مٹی کا طوفان اور بوندا باندی
اُن کا کہنا تھا کہ ’این ڈی ایم اے نے اربن فلڈ کی وارننگ جاری کی اُس کے باوجود شہر کے 30 سے زائد نالوں کو نکاسی کے قابل نہیں بنایا گیا، ہم گزشتہ چار سالوں سے نالوں کی صفائی کا مطالبہ کررہے ہیں‘۔
اُن کا کہنا تھا کہ لوگ کرونا سے کم جبکہ سندھ حکومت کی نااہلی سے زیادہ مریں گے، سندھ حکومت کے وزرا صرف فوٹو سیشن کیلیے نالوں کا دورہ کررہے ہیں۔
0
20
