فاسٹ بولر نسیم شاہ نے ڈیوک اورکوکوبرا بال کا فرق بتا دیا

مانچسٹر: قومی کرکٹ ٹیم کے فاسٹ بولرنسیم شاہ کا کہنا ہے کہ آہستہ آہستہ کنڈیشنز کے مطابق کھیلنے کی پریکٹس ہورہی ہے، ڈیوک اور کوکوبرا بال میں فرق ہے۔

تفصیلات کے مطابق قومی کرکٹ ٹیم کے فاسٹ بولرنسیم شاہ کا کہنا ہے کہ کوکوبرا بال خراب جلد ہوجاتا ہے زیادہ سوئنگ اور سیم نہیں ہوتا، ڈیوک بال جب تنگ کرنے پر آئے تو بہت تنگ کرتاہے۔

نوجوان فاسٹ بولر نے کہاکہ تین ماہ بعد پریکٹس میچ ملا جو کھیل کر بہت اچھا لگا، ووسٹر میں موسم بہت اچھا ہے، ڈیوک بال کی وجہ سے سوئنگ بھی ملی۔

نسیم شاہ نے کہا کہ سویٹر اور گلاسز امپائرز کو نہ دینے کی پریکٹس کررہے ہیں، موسم کی وجہ سے فیلڈرز کو پسینہ نہیں آتا بولرز کو ہی پسینے سے گیند چمکانا ہوتی ہے۔

Mohammad Abbas and Naseem Shah talk about return to cricket and bowling with the Dukes ball.@Mohmmadabbas111 @iNaseemShah pic.twitter.com/LTMaxRxqkV

— Pakistan Cricket (@TheRealPCB) July 6, 2020

انہوں نے کہا کہ بہت کوشش کرتے ہیں کہ بال کوتھوک سے نہ چمکائیں، پسینے کے ساتھ بال شائن ہوتا رہے تو اچھا ہے۔

دوسری جانب فاسٹ بولر محمد عباس نے کہاکہ سیریز سے پہلے بھجوانے کا فیصلہ اچھا ہے، کاؤنٹی کرکٹ کھیلنے کا بہت فائدہ رہا۔

محمد عباس نے مزید کہا کہ پہلا دن تھا میچ کا اس لیے مشکل رہا کیونکہ اب سوئیٹر اور کیپ سب خود ہی باؤنڈری پر جا کر چھوڑنا پڑتا ہے اور مڈ آف مڈ آن پر فیلڈنگ کرنا پڑتی ہے جو کہ تھوڑا مشکل ہے۔

خیال رہے کہ قومی کرکٹ ٹیم ان دنوں ٹیسٹ اور ٹی ٹوئنٹی سیریز کے لیے انگلینڈ میں موجود ہے اور دونوں ٹیموں کے درمیان پہلا ٹیسٹ 5 اگست کو اولڈ ٹریفورڈ مانچسٹر میں کھیلا جائے گا۔