مریض بھی روزہ رکھ سکتے ہیں!

کورونا قرنطینہ میں رہنے والے مریض کیسے روزہ رکھیں؟ فوٹو: فائل

اللہ تعالیٰ کی مسلمانوں پر بے پناہ عنایات ہیں۔ اللہ کی بے شمار اور اَن گنت نعمتوں میں رمضان المبارک کا مبارک مہینہ بھی شامل ہے۔

اللہ تعالیٰ خود قرآن پاک میں فرماتے ہیں: ’’ تم پر روزے اس لیے فرض کیے گئے تاکہ تم متقی اور پرہیز گار بن جاؤ۔‘‘ رمضان المبارک کا مہینہ نیکیوں کا مہینہ ہے۔ اس مہینے شیطان قید کر دیئے جاتے ہیں اور نیکیوں کا اجر 70 گنا بڑھا دیا جاتا ہے۔

روحانی بالیدگی کے ساتھ ساتھ رمضان جسمانی تطہیر اور پاکیزگی کا بھی مہینہ ہے۔ اسلام میانہ روی کا درس دیتا ہے۔ رمضان المبارک میں اگر سحر اور افطار کے دوران کھانے پینے میں اعتدال کیا جائے تو بندہ خود بخود صحت مند اور توانا رہتا ہے۔ لیکن اگر سحری اور افطاری میں اعتدال اور میانہ روی کو پیش نظر نہ رکھا جائے تو بہت سارے مسائل پیدا ہو سکتے ہیں۔

اکثر دیکھا گیا کہ افطاری کے دوران جھٹ پٹ ہر چیز ہڑپ کرنے سے بہت سے لوگ تبخیر معدہ اور پیٹ کی بیماریوں کا شکار ہو جاتے ہیں۔ زیادہ مرغن کھانے، تلی ہوئی اشیاء اور کولڈ ڈرنکس پینے سے رمضان میں روزے رکھنے کے باوجود وزن میں اضافہ ہو جاتا ہے۔ رمضان المبارک میں سحری اور افطاری میں متوازن غذا کا شامل ہونا ضروری ہے۔ سحری اور افطاری میں پھل، سبزیاں، دودھ، گوشت مناسب مقدار میں شامل ہونا چاہیے۔

بعض لوگ سحری کے لیے اٹھتے ہی نہیں۔ روزہ کے لیے سحری سنت ہے۔ سحری کے بغیر روزہ رکھنا روزہ کی افادیت کو گھٹا دیتا ہے۔ حضور نبی کریم ﷺ  نے زور دے کر کہا کہ سحری لازمی کیا کرو۔ سحری نہ کھانے سے بندہ جسمانی کمزوری کا شکار ہو جاتا ہے۔ اس کا اثر جسم کے سارے افعال پر بھی پڑتا ہے۔ بغیر سحری کھائے روزہ رکھنے والے حضرات ساری کمی افطاری کے وقت پوری کرتے ہیں جو کچھ سامنے آئے اسے ہڑپ کرنے کی فکر ہوتی ہے۔ اتنا کچھ کھا لیتے ہیں کہ نماز پڑھنے کی بھی طاقت نہیں رہتی۔ سارا وقت ڈکارتے رہتے ہیں۔ گیس اور تبخیر معدہ میں مبتلا ہو جاتے ہیں۔ اس لیے ضروری ہے کہ بندہ اہتمام سے سحری کرے۔ سحری میں مرغن غذا کھانے سے پرہیز کریں۔ دہی اور لسی کا استعمال بھی مفید ہے۔ سحری میں سلاد اور سبزی کا استعمال بھی صحت کے لیے بہتر ہے۔

سحری میں کسی قسم کے کولڈ ڈرنکس کا استعمال نہیں ہونا چاہیے۔ کافی لینے سے بھی معدہ میں تیزابیت پیدا ہو سکتی ہے۔ مزید براں سحری کے دوران زیادہ نمکین چیزوں مثلاً اچار اور مصالحہ دار اشیاء سے پرہیز کرنا چاہیے۔ سحری کے لیے اٹھتے ہی دو تین گلاس پانی پی لیں اور اس کے بعد کھانا کھائیں۔ سحری کرتے ہی فوراً سو جانا مضر صحت ہے۔ سحری کے بعد کچھ دیر انتظار کریں۔ ہلکی سے واک کر لیں۔ قرآن پاک کی تلاوت کریں۔ نماز کے لیے مسجد جائیں اور اس کے بعد آرام کر سکتے ہیں۔

افطاری بھی اعتدال کے ساتھ ہونی چاہئیں۔ افطاری میں خوامخواہ کے نام و نہاد انرجی ڈرنکس سے پرہیز کریں۔ اس کی بجائے گھر میں بنائے ہوئے شکر شربت ، سکنجین ، شربت تخم ملنگاں، کچی لسی کا استعمال کریں۔ بہت زیادہ پکوڑے اور سموسے کھانے سے معدے پر اضافی بوجھ پڑ جاتا ہے۔ بھوک مر جاتی ہے اور قبض کی جاں لیوا تکلیف سے پالا پڑ جاتا ہے۔ اس لیے افطاری میں مرغن غذاؤں، کولڈ ڈرنکس، زیادہ نمکین چیزوں سے پرہیز کریں۔ نمک کا زیادہ استعمال عمر گھٹاتا ہے۔ ہائی بلڈ پریشر اور بہت سے دوسرے امراض کا باعث بنتا ہے۔ آ

ج کل افطاریوں میں اتنا کچھ ہوتا ہے کہ بندہ کو سمجھ ہی نہیں آتی کہ کیا کھائے اور کیا چھوڑے۔ کھاتے ہوئے اعتدال کو پیش نظر رکھیں۔ کھجور سے افطاری سنت بھی ہے اور جسم کے لیے فائدہ مند بھی۔ اس سے جسم کو قوت ملتی ہے۔ ہڈیاں  مضبوط ہوتی ہیں۔ دو تین کھجوروں کے ساتھ شربت تخم ملنگاں یا فالسے کا شربت جسم کو فوری توانائی مہیا کرتا ہے۔ افطاری میں پھلوں اور ان کے جوس کا زیادہ سے زیادہ استعمال کریں۔ انرجی اور کولا ڈرنکس سے مکمل طور پر پرہیز کریں۔ مرغن غذاؤں کے ساتھ بہت زیادہ میٹھی چیزوں مثلاً کیک، پیسٹریوں، مٹھائیوں اور حلوہ جات کا کم سے کم استعمال کریں۔

رمضان المبارک کے آغاز سے مختلف قسم کے مریض پوچھنا شروع کر دیتے ہیں کہ ڈاکٹر صاحب ہم روزہ رکھ سکتے ہیں۔ روزے سے ہماری بیماری تو متاثر نہیں ہوگی؟ بہت سی میڈیکل تحقیق سے یہ بات ثابت ہو چکی ہے کہ روزہ روح کے ساتھ جسم کے لیے بھی ایک زبردست ریفریشر کورس کی حیثیت رکھتا ہے۔ اس سے جسم کو آرام اور سکون ملتا ہے۔ جسم کے تمام اعضاء، سسٹم خاص کر معدہ، جگر اور خون کی نالیاں بے ہنگم کھانوں کے بوجھ سے کچھ دیر کے لیے آزاد ہو جاتے ہیں۔ نیوزی لینڈ کے ایک پادری کا کہنا ہے کہ مجھے اسلام میں رمضان المبارک کے روزوں کے فلسفے نے بہت متاثر کیا۔

بہت سے لوگ اس خوف کے پیش نظر روزہ نہیں رکھتے کہ روزہ کے سبب یا روزہ کی حالت میں کہیں مرض کا غلبہ یا پیچیدگی پیدا نہ ہو جائے حالانکہ ایسا ہرگز نہیں۔ جدید میڈیکل سائنس نے یہ ثابت کیا ہے کہ روزہ دار کے جسم میں دوسرے افراد کی نسبت قوت مدافعت (Immunity) کئی گنا بڑھ جاتی ہے اور پھر دوران روزہ اندرونی اعضاء کی کارکردگی میں کمی واقع ہونے کے باعث انہیں آرام مل جاتا ہے اور بعد از آرام یہ اعضاء تازہ دم اور مستعد ہو جاتے ہیں۔ اس طرح ان اعضاء کی کارکردگی میں اضافہ ہوتا ہے۔ اس کا عام سبب یہ ہے کہ اعضائے رئیسہ (Vital Organs) کو تقویت ملتی ہے۔ روزے کی اس مسلمہ افادیت کو غیر مسلم اطباء نے بھی تسلیم کیا ہے بلکہ اہل مغرب مختلف امراض کے علاج میں روزہ رکھوا کر کامیاب علاج کرنے لگے ہیں۔

ڈاکٹر ڈی جیت (Dr. D. Jeet )کا کہنا ہے کہ روزہ رکھنا امراض کی روک تھام کے لیے تقدم بالحفظ (Prevention) کی حیثیت رکھتا ہے۔ ڈاکٹر جوزف (Yossaf) کا کہنا ہے کہ روزہ سے ظاہر و باطن کی غلاظتیں دور ہو جاتی ہیں یعنی روزہ جسمانی و روحانی خرابیوں کا دافع ہے۔ روزہ بسیار خوری (Over Eating) سے بچاتا ہے جس سے معدہ و جگر کا عمل درست ہوتا ہے۔

مریضوں کی تین اقسام ہیں: پہلی قسم میں عام بیماریوں، مثلاً کھانسی، نزلہ، زکام، خارش، ڈائریا، پیٹ درد، جسم درد، جوڑوں کے درد، کبھی کبھار بلڈ پریشر، چکر، متلی اور قے وغیرہ کی علامات اور بیماریوں کے مریض شامل ہیں۔ ایسے مریض روزہ رکھ سکتے ہیں۔ انھیں کوئی مسئلہ نہ ہوگا۔ روزہ رکھنے کے ساتھ انھیں اپنی دوا کی مقدار اور خوراک کا تعین اس طریقے سے کرنا ہوگا کہ دوائی کی پہلی خوراک افطاری کے فوراً بعد لیں۔ دوسری خوراک تراویح نماز پڑھنے کے بعد رات سونے سے پہلے لے لیں اور تیسری خوراک صبح سحری کے بعد لے لیں۔ ایسے مریضوں کے لیے روزہ رکھنا ضروری ہے کیونکہ روزہ رکھنے سے ان کے امراض کی علامات میں کمی ہوگی۔

دوسری قسم میں وہ مریض شامل ہیں۔ جو پرانی بیماریوں مثلاً ذیابیطس، بلڈپریشر، دل کی تکلیف، گردوں کی خرابی، السر اور دماغی امراض وغیرہ میں مبتلا ہیں۔ ایسے مریض بھی روزہ رکھ سکتے ہیں۔ شوگر کے مریضوں کے لیے ضروری ہے کہ وہ اچھے طریقے سے سحری کریں۔ سحری میں کھانے کے علاوہ پانی اور شربت وغیرہ کا ٹھیک ٹھاک استعمال کریں۔ کیونکہ روزہ رکھنے سے شوگر میں کمی اور جسم میں پانی کی کمی درپیش ہو سکتی ہے۔ اس لیے ضروری ہے کہ خاطر خواہ پانی کا ذخیرہ پیٹ میں رکھا جائے۔ شوگر کے مریض ڈاکٹر کے مشورہ سے اپنی دوا کی مقدار متعین کر سکتے ہیں۔ جو مریض دوا دن میں تین مرتبہ لیتے ہیں وہ دوا کو افطاری کے فوراً بعد، رات سوتے وقت اور سحری کے وقت لے سکتے ہیں۔

ذیابیطس شکری کے وہ مریض جو علاج کے لیے انسولین (Insulin) استعمال کرتے ہیں انہیں گلوکوز کنٹرول رکھنے میں مشکل پیش آ سکتی ہے۔ انسولین استعمال کرنے والے سحری کے وقت انسولین کی مقدار کم کر کے خون میں گلوکوز کی مقدار زیادہ کر دینے کا باعث بھی بن سکتی ہے اور پھر افطاری کے وقت غیر محتاط کھانا (بسیار خوری) بھی خون بھی گلوکوز کی زیادتی کا باعث بنتا ہے۔

چنانچہ رمضان المبارک کی آمد مریض اور معالج دونوں کے لیے خون میں گلوکوز کی کمی سے خوف ہوتی ہے لیکن طب جدید کا نظریہ یہ ہے کہ خائف ہرگز نہ ہوں کیونکہ روزے مریض اور معالج کے لیے مشکلات یا کسی قسم کی دشواری پیدا نہیں کرتے بلکہ روزہ دار مریض کا شوگر لیول نارمل ہو جاتا ہے جبکہ ایسے اشخاص جو روزہ دار نہ ہوں ان کا شوگر لیول اُتار چڑھاؤ کا شکار رہتا ہے۔ بڑی عمر کے لوگ یہ سوال ضرور کرتے ہیں کہ ڈاکٹر صاحب ہم تراویح پڑھ سکتے ہیں کہ نہیں۔ شوگر اور ہائی بلڈ پریشر کے مریض بیٹھ کر تراویح کی نماز ادا کر سکتے ہیں۔

تیسری قسم میں وہ مریض شامل ہیں جو خطرناک جاں لیوا موذی امراض میں مبتلا ہیں۔ ان میں کینسر، شوگر، فالج، گردوں کی ناکامی وغیرہ شامل ہیں۔ ایسے مریضوں کے لیے ویسے بھی روزہ رکھنا ممکن نہیں ہے۔ یہ روزہ نہ رکھیں کسی روزہ دار کا روزہ افطار کرانے کے لیے یا کسی غریب کی مدد کرنے کے واسطے یہ روزہ کا فدیہ دے سکتے ہیں۔

روحانی اور جسمانی فائدوں کے علاوہ ذہنی و نفسیاتی امراض کے علاج کے لیے بھی روزے رکھنا بہت فائدہ مند ثابت ہوتا ہے۔ روزہ رکھنے سے آدمی برے خیالات سے دُور رہتا ہے۔ ذہن پراگندہ نہیں ہوتا۔ فکر، ڈپریشن اور خوامخواہ کی پریشانیوں سے چھٹکارہ ملتا ہے۔

اس کے علاوہ روزہ تزکیۃ النفس بھی کرتا ہے۔ ماہ صیام میں نماز تراویح میں خشوع و خضوع اور دھیان سے کلام اللہ سننے سے ذہنی سکون اور اطمینان قلب نصیب ہوتا ہے۔ تہجد کے لیے یا پھر سحری کرنے کی غرض سے جب آدمی بیدار ہوتا ہے تو اس وقت چونکہ وہ اپنی نیند پوری کر چکا ہوتا ہے اور تازہ دم بیدار ہوتا ہے اور پھر اس وقت آکسیجن (Oxygen) وافر مقدار میں میسر ہوتی ہے جو ذہن کو تازگی اور تقویت دیتی ہے اور پھر سحری کھا لینے کے بعد جب پورے انہماک سے نماز، تلاوت یا تسبیحات میں لگ جائے تو اس وقت اسے عبادت میں لذت کا احساس ہوگا اور مذہب میں لگاؤ بڑھتا جائے گا۔

اس کا نفسیاتی پہلو یہ ہے کہ جب وہ بیدار ہوا تو اس وقت اس کا دماغ ہر قسم کے دباؤ یا بوجھ سے آزاد تھا اور پھر اسی تازگی کی حالت میں وہ عبادت میں مشغول ہو گیا اور اسے غیر ضروری باتوں پر سوچنے کا موقع ہی نہ ملا اس طرح اس کی دماغی کیفیت معتدل ہوتی چلی جاتی ہے اور مختلف قسم کی ذہنی اور نفسیاتی الجھنیں اس کو پریشان نہیں کرتیں۔ اگر آپ کسی قسم کی نفسیاتی اور ذہنی الجھن کا شکار ہیں تو ادب  و آداب کی رعایت رکھتے ہوئے روزہ رکھیں۔ پنچ وقتہ نماز پڑھیں۔ خشوع و خضوع کے ساتھ نماز تراویح ادا کریں۔ ذہنی و ابدی سکون کے لیے اللہ کا ذکر کریں اور قرآن پاک کی تلاوت کریں۔ ان شاء اللہ آپ کے سارے مسائل حل ہو جائیں گے۔

قرنطینہ میں رہنے والے افراد کیسے روزہ رکھیں؟

کرونا وائرس کے خدشے سے قرنطینہ میں گھر میں رہنے والے لوگ بھی بہ آسانی روزہ رکھ سکتے ہیں۔ اس سلسلے میں اگر طبعیت زیادہ خراب ہو تو پھر روزہ نہ رکھیں۔ آپ ان روزوں کو بعد میں بھی رکھ سکتے ہیں یا پھرروزوں کا فدیہ دے سکتے ہیں۔ لیکن جو لوگ قرنطینہ میں رہتے ہوئے رمضان کے روزے رکھنے کے خواہش مند ہوں۔ ان کے لیے ضروری ہے کہ وہ اس دوران اپنی قوت بحال رکھیں تاکہ ان میں بیماری اور وائرس کے خلاف قوت مدافعت برقرار رہے۔

آپ اپنے کمرہ میں قرنطینہ میں ہیں تو جب آپ سحری کے لیے اٹھائیں تو سب سے پہلے نہار منہ دو تین گلاس گرم پانی لیں۔ ساتھ دو چمچ شہد اورایک چمچ زیتون کا تیل لیں۔ اس سے سارا دن آپ کی قوت بحال رہے گی۔ سحری نارمل طریقے سے کریں۔ دہی اور تازہ پھلوں کا استعمال ضرور کریں۔ سحری میں پراٹھا اور سالن بھی لے سکتے ہیں یا سادہ چپاتی استعمال کریں۔ سحری ختم ہونے سے پہلے ایک کپ گرم دودھ میں اسپغول کا چھلکا ڈال کر استعمال کریں۔ افطاری میں سب سے پہلے دو تین کھجوریں لیں۔

اس کے ساتھ ساتھ فریش فروٹ جوس کے دو گلاس لیں۔ آج کل اسٹرابری عام ملتی ہے۔ یہ خوش ذائقہ ، خوش نما اور وٹامن اور منزلز سے بھر پور پھل ہے، اس کا ملک شیک بنا کر لیں۔ زیادہ پکوڑے اور سموسے کھانے سے پرہیز کریں۔ مغرب کی نماز کے بعد کھا نا کھائیں۔ کھانے میں متوازن غذا استعمال کریں۔ مغرب سے عشاء تک تین چار گلاس پانی استعمال کریں۔ سونے سے تقریباً ایک گھنٹہ پہلے آپ نے ایک کپ گرم دودھ میں دو چمچ زیتون کا تیل، دو چمچ شہد اور ایک چمچ ہلدی کا ڈال کر پینا ہے۔

اس سے آپ کی قوت مدافعت میں اضافہ ہوگا اور اگر خدانخواستہ  اگر آپ کا کورونا ٹیسٹ مثبت بھی آگیا تو آپ نے اس نسخے پہ عمل کرنا ہے انشاء اللہ آپ کورونا کے انفیکشن سے صحت یاب ہو کر نکلیں گے اور قرنطینہ میں رہتے ہوئے بھی رمضان المبارک کی برکات و فیض سے فیض یاب ہو سکیںگے۔

About Express News

Avatar

Check Also

کیا کرونا ویکسین کی 2 خوراکیں ناکافی ہوں گی؟ –

واشنگٹن: امریکی فارما سیوٹیکل کمپنی فائزر کا کہنا ہے کہ ایک سال کے اندر کرونا …

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے