اسلام آباد: (03 جولائی 2020) فواد چوہدری نے کہا ہے کہ مجھے سمجھ نہیں آتی کہ مریم نواز کو مزید کیا رعایت چاہیے؟ مریم نواز کے والد نے تو سزا کاٹی ہی نہیں، بوریا بستر اور پلیٹیں اٹھا کر لندن چلے گئے۔
جج ارشد ملک کی برطرفی کے معاملے پر وفاقی وزیر سانئس و ٹیکنالوجی فواد چوہدری نے مریم نواز کے بیان پر ردعمل کا اظہار کرتے ہوئے کہا ہے کہ نواز شریف تو لندن میں ہائید پارک میں گھومتے پھرتے ہیں۔ مجھے نہیں اندازہ کہ انہیں کیا رعایت چاہیے؟ میرے خیال میں نواز شریف کو سزا کم ملی ہے۔
انہوں نے کہا کہ احتساب پی ٹی آئی کا وعدہ تھا، اس پر ڈلیوری اہم ہے۔ مائنس ون وہاں ہوتا ہے، جب لیڈر پارٹی سے چھوٹا ہو۔ جہاں لیڈر پارٹی سے بڑا ہو وہاں مائنس کیسے ہوسکتا ہے؟ وزیر اعظم اپنی پارٹی کا تحریک انصاف کے بجائے “عمران خان کی پارٹی” رکھ دیں وہ بھی مقبول ہوگی۔ عوام کا ووٹ عمران خان کے نام پر پڑتا ہے۔
فواد چوہدری نے کہا کہ وزیراعظم عوام کا مینڈیٹ لے کر آئے ہیں۔ ہم عوام سے اصلاحات کا وعدہ کر کے آئے تھے، ہمیں اس پر توجہ دینی چاہیے۔ موجودہ حکومت کو کوئی خطرہ نہیں، 5 سال پورے کریں گے۔
وفاقی وزیر نے سندھ حکومت کی جانب سے جے آئی ٹی کھولنے کو خوش آئند قرار دیتے ہوئے کہا کہ اچھا فیصلہ ہے، حقائق عوام کے سامنے آنے چاہئیں۔ باقی فیصلہ عدلیہ نے کرنا ہے۔
