لاہور: (05 جولائی 2020) پنجاب کے ٹیچنگ اسپتالوں سے 48 ڈاکٹروں نے استعفیٰ دے دیا۔ محکمہ صحت نے بھی ڈاکٹرز کے استعفوں کو منظور کرلیا۔
پنجاب میں کورونا وائرس کے کیسز میں ہر گزرتے دن کے ساتھ اضافہ جاری ہے تو دوسری جانب حکومت اور ڈاکٹرز کے درمیان خلا بڑھنے لگا۔ صوبے کے سرکاری اسپتالوں کے 48 ڈاکٹروں نے استعفیٰ دے دیا۔
لاہور کے میو اسپتال سے 14، جناح اسپتال سے 7، گورنمٹ نواز شریف یکی گیٹ، سروسز اور لیڈی ایچی سن اسپتال سے 2،2، جنرل اسپتال سے 3، کوٹ خواجہ سعید، شاہدرہ ٹیچنگ اور میاں منشی اسپتال سے ایک، ایک ڈاکٹر نے ملازمت چھوڑ دی ہے۔ الائیڈ اسپتال فیصل آباد سے 2، ڈی جی خان اسپتال سے 4، سول اسپتال بہاولپور اور شیخ زید اسپتال سے 2،2 ڈاکٹرز مستعفی ہوئے ہیں۔
محکمہ اسپیشلائزڈ ہیلتھ کیئر ایندمیڈیکل ایجوکیشن نے استعفیٰ منظور کر کے نوٹیفیکیشن جاری کردیا۔ ڈاکٹروں کے استعفیٰ پر ینگ ڈاکٹرز ایسوسی ایشن پنجاب کے صدر ڈاکٹر سلمان حسیب کا کہنا ہے کہ استعفوں کی وجہ ایم ٹی آئی ایکٹ اور کورونا سے بچاؤ کے حفاظتی سامان کی کمی ہے۔
ینگ ڈاکٹرز کا کہنا ہے کہ اگر ایسی ہی بے یقینی کی صورتحال رہی تو مزید ڈاکٹرز بھی چلے جائیں گے۔ پھر حکومت خود اسپتال کے انتظامات چلائے گی۔
